ملك و خاتم التسبيح

" />


دخلت #ملك الأوضه ومسكت خاتم التسبيح وفضلت كالعاده تسبح عليه بعدين سألت :
عمتو ندا ؟

أنا : نعم ^^

ملك : إحنا ليه بنقول سبحان الله وبحمده والحمدلله واستغفر الله والحاجات دي  ؟؟؟!!!

أنا : أممممم لو عاوزه تعرفي تعالي أقعدي جنبي

وعلى طول جت قعدت جنبي ومستنيه تفهم  !

أنا : غمضي عنيكي  

سندت راسها على كتفي وغمضت عنيها

أنا : تعرفي إن الرسول صلي الله عليه وسلم

ملك : عليه الصلاة والسلام

أنا : قال إن إللي يقول سورة الاخلاص 10 مرات يتبنيله قصر فـ الجنه ؟ تعالي كده نبني لنفسنا قصر فـ الجنه

ملك : بتاعي أنا وانتي ؟؟؟؟

أنا : لأ كل واحد هيتبنيله قصر لوحده يلا نبدأ كده وإتخيلي قصرك وهو بيتبني بقى  

أنا وهي : (( بِسْمِ اللَّهِ الرَّحْمَنِ الرَّحِيمِ
قُلْ هُوَ اللَّهُ أَحَدٌ (١) اللَّهُ الصَّمَدُ (٢) لَمْ يَلِدْ وَلَمْ يُولَدْ (٣) وَلَمْ يَكُنْ لَهُ كُفُوًا أَحَدٌ (٤) )) .......إلخ

أنا ومازلنا مغمضين عنينا : الله القصر بتاعي شكله جميل أوووي ما شاء الله وإنتي يا ملك شفتي قصرك شكله عامل ازاي ؟

ملك : أه جميل أووي

أنا : أممممم بس إحنا محتاجين نحط شوية زرع حوليه عشان يبقي شكله أجمل صح ؟

ملك : أيوه صح

أنا : بسيييطه تعرفي بقى إننا لما نقول سبحان الله وبحمده الملايكه بتزرع لنا فـ الجنه نخل من دهب ؟؟!! يلا بقى نزرع حولين القصر بتاعنا نخل

ملك : يلا  سبحان الله وبحمده ،،، سبحان الله وبحمده ،،،، سبحان الله وبحمده ...إلخ

بعد دقايق بتضحك وهي لسه مغمضه : أنا زرعت نخل كتيييير   قصري بقى أحلي من بتاعك  

أنا : لأ أنا هقول أكتر منك عشان قصري يبقي أحلي  

ملك : طاب  سبحان الله وبحمده ،،، سبحان الله وبحمده ...إلخ

وفضلنا نتسابق ع إللي يزرع أكتر

سكتت شويه : عمتو ندا ؟ هو إحنا ينفع نبني حاجات تانيه ؟

أنا : أيوووه طبعاً ينفع كل ما تذكري ربنا هتبني لنفسك حاجه بتحبيها فـ الجنه

ملك : طاب أنا عاوزه أبني مرجيحه ؟؟

أنا : يلا نبني مراجيح ،سبحان الله والحمدلله ولا إله إلا الله والله أكبر ولا حول ولا قوة إلا بالله وصل اللهم وسلم على سيدنا محمد ...إلخ

ملك : طاب ينفع أبني النطاطه ؟؟

أنا : نطاطه   ؟

ملك : أيوه إللي بحب أركبها دي وركبتها أنا وعمر في العيد

أنا : أه ينفع أي حاجه بتحبيها بقى تقدري تبنيها فـ الجنه  

فضلت تذكر الله وهي مغمضه عنيها وبتبني ملاهي فى الجنه  

وكل دقيقتين تضحك وتقولي بنيت كذا    .......
~
~
~
كتب الأطفال بتختلف عن الكبار كلها صور ورسومات ليه ؟؟!

لإن الطفل بيعتمد أكتر على إنه يشوف صورة الحاجه قصاده أو يقدر يرسمها فـ خياله الطفولي عشان كده لما تيجوا تعلموا أولادكم حاجه قبل ما تهتموا بالحاجه إللي لازم يتعلموها اهتموا بالأسلوب إللي هيوصلهم الحاجه دي صح ويحببهم فيها )

كان ممكن لما سألتني ليه بنسبح ربنا أقولها عشان بنزرع نخله فـ الجنه ساقها من دهب وخلاص !

طاب إيه هي النخله إللي ساقها من دهب ولا القصر إللي هيتبني ولا إيه هي الجنه أساساً فـ مخيلتها كطفله ؟!! عادي كانت هتكبر وتبقى زي كتير مننا بيملوا من العباده لإنهم كبروا من غير ما يتخيلوا ثمرة العباده دي إيه !بيعبدوا ربنا من غير ما قلبهم يعبده   !

خلي طفلك يشوف #الجنه وثمرة عمله بـ #عين_قلبه  )

مثلاً هي إختارت حاجات طفوليه زي المرجيحه ولا قبل كده كان نفسها الجنه يبقي فيها شوكولاته وأيس كريم ولبان كتير لو طفلك سألك عن الجنه ماتقولش
الجنه فيها أنهار من لبن وخمر وعلى الأرائك متكئين وحور عين ...إلخ

هتلاقي طفلك عامل كده   !

أصله مش فاهم حاجه من إللي بتقولها  !
عشان تفهمه حاجه لازم تنزل بتفكيرك لمستواه هو ، تفكر معاه بعقل #طفل
إخترع أسهل طريق ممكن يوصله المعلومه صح وتخليه يحبها ويتشجع انه يتعلم ويسأل أكتر  

وقبل ما تقوله لو عملت كذا هتدخل الجنه عرفه الأول إيه هي الجنه وحببوا فيها )

مثلاً إنتي وزوجك أو إنت وزوجتك يعني لما تشتروا حاجه حلوه وعاجبه طفلكم زي الأيس كريم وإنتوا بتاكلوه قولوا الله فـ الجنه هنلاقي من الأيس كريم ده كتييير
لو روحتوا تتفسحوا فـ مكان جميل وعجب طفلكم وانبسط فيه قولوا قصاده فـ الجنه إن شاء الله هنعيش فـ مكان زي ده وأجمل كمان

اتكلموا عن الجنه كتيير قصاده أو خدوا طفلكم فـ رحله قبل النوم للجنه  

كل يوم حطي طفلك فـ حضنك وقوليلي تيجي نزور مكان فـ الجنه ، غمضوا عنيكوا سوا وإبدأي أوصفيله أي مكان بيحبه وخليه يتخيله معاكي

ومش الجنه بس فـ أي حاجه تانيه فـ حياة طفلك

لما عماره بتتبني بطوب مغشوش ولا أي كلام بعد فتره العماره بتتهد على صاحبها وطفلك إنتي إللي بتبنيه لازم تختاري أساس سليم لتأسيس طفلك
وماتنسيش دايماً إنك هتتسألي عليه قدام #ربنا )
.
.
.
ربنا يجعل أولادنا جميعاً ذرية صالحه وسبب فـ دخولنا #الجنه  
(( وبالمناسبه إللي فـ الصوره دي ملك بنت أخويا وأختي وبنتي وصديقتي الصدوقه ^_^ ))

لـ #ندا_سليمان