رساله لكل أم وأب

[img][/img]



معلش البوست طويل شويه بس تعالوا على نفسكم واقروه يمكن يفيدكم
في يوم 27 مارس 2011 ) حوالي الساعه 1 الظهر رن موبايلي وكانت #دعاء صحبتي الأنتيم

أنا : أيوه يا قلبي وحشتيني بقالي خمس دقايق ماشفتكيش ولا سمعت صوتك

دعاء : نداااااااااااا أنا مش مصدقه مباااارك يا قلبيييي أنا فخوره بيكي أوووي

أنا : الله يبارك فيكي بس هو فيه ايه هو انا عملت ايه ولا مين دعاااء انا مش فاهمه حاجه !!!!!!!!!

دعاء : قصيدتك واسمك منورين جريدة #القناه بابا لسه داخل من الشغل وبيقولي قصيدة ندا نزلت فـ الجريده انهارده واهه مسكاها فـ ايدي

ندا : مش ممكن يعني نزلت نزلت متأكده ؟؟؟؟؟!!!

دعاء : اه والله يا بنتي بقولك الجريده فـ ايدي اهه وانا حافظه قصيدتك

ندا : يا الله

دعاء : عقبال ما أشوف أول كتاب ليكي

ندا : يا رب يا قلبي

قفلت معاها وبسرعه كلمت أخويا وإتأكدت منه وقالي ان الجريده معاه وهيجبهالي لما يرجع من الشغل إن شاء الله

وماصدقتش غير لما مسكتها فـ ايديا وقريت اسمي بـ عنيا ، وقتها عيني لمعت أوووي ودمعت حسيت وقتها بإحساس مايتوصفش ، يمكن لمست بإيديا حلمي اللي واقف بعيييد وبحاول اوصله !
أمي إدتني فرصه ألمسه بإيديا واتشجع اكتر اني اوصله :'))

أيوه #أمي أصل نشر القصيده دي كانت هديه منها ليا فـ جريدة القناه المحليه بمحافظة الاسماعيليه ( القصيده إللي فـ الصوره )

يومها اترميت فـ حضنها وحسيت إني #هقدر أيوه هقدر أحقق #حلمي وكسرت كلمة #مستحيل .

اقفوا عند النقطه اللي بعد مستحيل عشان هاخدكم معايا فـ رحله ، تعالوا معايا كده وانا طفله
~
~
~
فـ مره واحده الله يسهلها بقى وانا طفله صغيره عملتلي اختبار
(( كانت فاكره نفسها بتفهم فـ علم النفس )) سقطت فـ الاختبار ده وكانت النتيجه قالت لـ أمي إني هطلع متخلفه عقلياً

وكبرت وبقت فيا عاده غريبه من صغري وانا بكلم نفسي وطبعاً كلامي لنفسي زي المجانيين أكدلهم اني هطلع متخلفه ونص كمان هههههههه
إلا واحده بس #أختي
كانت مؤمنه إن اللي انا فيه ده مش تخلف ولا حاجه بالعكس دي نعمه من ربنا إن هيكون خيالي خصب جداً إن شاء الله لما أكبر

انا فاكره كويس اوي اللي كنت بعمله وانا صغيره ، انا كنت لو شفت فيلم مثلاً ولا مسلسل أدخل أوضتي وأمثله بكل تفاصيله والغريب اني بكون كل الممثلين وبقوم بكل الأدوار وأقلد كل الأصوات والحركات
ويا سلام بقى لو فيلم أكشن ولا بوليسي وفيه جريمة قتل
ومع الوقت بقيت انا اللي بألف القصص الخاصه بيا بمزيج من كل القصص دي

كان أي حد يشوفني بعمل كده يتريق عليا ويقول اني هطلع هبله بس اختي كانت لما تشوفني عايشه فـ عالمي مع نفسي كانت بتسيبني واحياناً كانت بتشاركني

وماما بدأت هي كمان تقتنع ان انا طبيعيه
كان أي حد عاوز يفتكر حاجه او يعرف حاجه بكل تفاصيلها وخاصه لو كان فيلم يلجألي انا كنت بحكي كل حاجه أشوفها بالتفصيل حتي الحركات بمثلها ، و لو حد لابس حاجه بسرعه بلاحظ حتي شكل الرسمه اللي ع الهدوم بالتفصيل ، أختي فضلت تشجعني لحد ما كبرت وعلى فكره انا مازلت بكلم نفسي
احم احم بس طبعاً كلامي لنفسي دلوقتي يختلف عن زمان

ما علينا لما كبرت كان تفسير اختي لتصرفاتي هو اللي #صح ، فعلاً كان خيالي خصب كنت حتي لما أتضايق أو أفرح أخلق لنفسي عالم خاص بيا واعيش فيه :')) ولما تحصل حاجه وحشه أجري ع العالم بتاعي وأتخيل عكسها وأعيش كل لحظه حلوه فـ خيالي :'))

وبقيت بحب الكتابه وأول روايه كتبتها فـ حياتي كنت فـ أولي اعدادي ماكنتش بفرج أي حاجه أكتبها لحد غير دعاء صحبتي وأختي وماما
بعدين بدأت أوسع الدايره شويه كنت كل ما أكتب روايه أجمع صحباتي فـ حصص الألعاب وأقولهم هحكيلكم فيلم شفته ( كنت بقول كده عشان يندمجوا ويركزوا معايا ) أحكيلهم الروايه وكإنها فيلم فعلاً وبعد ما أخلص أقولهم إنها من تأليفي
ماكنش حد من قرايبي يعرف إني بكتب حتي اخواتي الولاد فجأه كده عرفوا اني بكتب شعر وروايات

بدأت ماما هي كمان تشجعني رغم ان ملهاش فـ الشعر ولا الكلام ده كله بس لما تقرا جريده وتلاقي قصيده تندهلي أقراها أو لو كنت فـ درس ألاقيها قصت القصايد من الجريده وجمعتهالي أول ما أرجع تديهالي أقراها ^_^ ولو بتقلب فـ التليفزيون ولقت شاعر بيتكلم مثلاً ولا أي حد بيقول شعر تندهلي أتفرج ، وأختي طول عمرها من يوم ما وعيت ع الدنيا وهي بتشجعني وكانت ومازالت بتديني فلوس اشتري الكتب اللي انا عوزاها
لحد ما بدأت أنمي الموهبه إللي ربنا أنعم عليا بيها وكل اللي انا فيه دلوقتي واللي هكون فيه بعدين ان شاء الله الفضل فيه يرجع أولاً لله ثم أمي وأختي ودعاء صحبتي وكل إنسان شجعني فـ حياتي

مش معني كلامي ده إني وصلت ولا أنا حاجه !!!
أنا لسه ماحققتش حلمي لسه ما عملتش حاجه تستحق ) !

بس أنا الحقيقه هدفي من البوست مش إني أتكلم عن نفسي وإن كانت البدايه اتكلمت فيها عن جزء من حياتي
البوست ده رساله لكل أم وأب بيقروه وكمان رساله لكل بنت وولد لسه ما اتجوزوش لإن مسيرهم فـ يوم من الايام هيبقوا أم وأب ومسؤولين عن اسره وأطفال

عاوزه أوصيكم على ولادكم ، إنتوا فاكرين انهم أطفال صغيرين مش هيفهموا أي حاجه لكن لأ الطفل عمره ما بينسي أي كلمه أو موقف أو تصرف فـ حياته ، انتي أمه أكتر واحده أدري بيه بيحب ايه ويكره ايه اتقربي من طفلك واكتشفي موهبته ماقدرتيش يبقي على الأقل تساعديه يكتشفها بنفسه ما تثبطيش همته وتحبطيه وتحسسيه انه ولا حاجه :/ ! علميه مايسمعش لكلام المثبطين للهمم ويكمل مشواره مهما سمع أو شاف من اللي حوليه

لو كانت أمي ولا أختي سمعوا لـ إللي قالتلهم إني هطلع متخلفه عقلياً كان طبيعي لما تشوفني بكلم نفسي تزعقلي وتمنعني ولو ماكنتش بتشجعني كل ما أكتب حاجه جديده ولا رغم انها مابتحبش الشعر تسمعني وتهديني قصيده فـ الجريده عشان أتشجع ^_^ عملت كل ده لمجرد انها شافتني مبسوطه ولاقيه نفسي فـ الحاجات دي كلها

إنتي اللي بإيديكي تصنعي الإبداع فـ طفلك وإنتي إللي بإيديكي تموتيه ! لإن إنتي أول بيئه بينشأ فيها !

فخدي بالك كويس أوي لإنك هتتسألي يوم القيامه عن أولادك )

ويا رب تكونوا إستفدتوا بأي حاجه من الرغي ده .....

لـ #ندا_سليمان