إنتخابات لأمناء إتحاد طلاب المدارس علي مستوي إدارة الإسماعيليه

[img][/img]


فـ أول إجتماع ليها أعلنوا إن فيه إنتخابات لأمناء إتحاد طلاب المدارس علي مستوي إدارة الإسماعيليه ، سجلت إسمها فـ المرشحين لأمناء الإتحاد لكنهم رفضوا وقالوا المنصب ده بيبقي للبنين تقدري تترشحي من أول منصب أمين مساعد وبالفعل سجلت إسمها
ولما أبله منال الأخصائيه إللي كانت مرفقاها عرفت قالتلها ماكنتيش وجعتي دماغك وإترشحتي كده كده مش هنفوز بيخلوا المناصب دي لـ مدارس معينه ومدرستنا عمرها ما فازت بأي لقب من دول ، ردت :
وليه تفضل القاعده إن الفوز لمدارس معينه وبس ليه مايكونش للأجدر بالمنصب ده فعلاً !!!!

مرت الأيام وجه ميعاد التصويت وإعلان النتيجه ، كان فـ مدرسة السلام بنات )
راحت البنت ومُدرستها معاها واثقه إنها مش هتفوز للحق البنت نفسها لـ لحظه صدقت كلام مدرستها وثقتها بنفسها إهتزت بس قالت يكفيني شرف المحاوله وهكمل للآخر مهما حصل ...

وبداية المفاجآت إن المفروض كل طالب مرشح لمنصب أمين وأمين مساعد إتحاد الطلاب يكون مجهز خطبه هيلقيها ع الطلبه وهي للأسف ماجهزتش حرف واحد
ولأنها مابتقبلش بالهزيمه بدأت تستعيد ثقتها بنفسها عشان تقدر تتصرف فـ موقف زي ده ، وقبل ما ترتب كلام ندهوا علي إسمها

سمت الله ووقفت ، بدأت ترتجل كلام بكل ثقه ، قوه وثبات رغم الخوف والقلق إللي جواها ، بدأت تقول كلام ومشاريع ومخططات هي نفسها أول مره تسمع عنها ،، إندمجت فـ الكلام ونسيت كل إللي حوليها ومافاقتش غير علي صوت تصفيقهم ليها
.
.
بدأ التصويت ، وهي سمعاهم بيتهامسوا بإسم مها البنت إللي من مدرسة السلام بنات و إللي متوقع تفوز بلقب الأمينه المساعده !
فـَ البنوته سلمت أمرها لله بس كان نفسها أوي تثبت عكس القاعده الأساسيه فـ إنتخابات كل سنه

بدأ إعلان النتيجه ، أعلنوا إسم الطالب إللي فاز بلقب الأمين وحانت اللحظه الحاسمه ، صوت ضربات القلب بيتصاعد لحظات ويتم إعلان النتيجه .... قال الموجه :
فاز بمنصب الأمين المساعد علي مستوي إدارة الإسماعيليه الطالبه #ندا_سليمان_محمود مدرسة #بدر_الإعداديه_بنات

وها قد حدثت المعجزه وإتكسرت القاعده ولأول مره فـ تاريخ مدرسة بدر بنت تفوز من عندهم
أنا كنت لحظتها عامله كده لحظات من الفرح والدهشه بالإضافه لـ نظرات الدهشه والتعجب علي وش مها وغيرها !

أستاذ (علي) الموجه باركلي وطلب مني المشاريع إللي إتكلمت عنها فـ ورقه وإذا بي مش فاكره ولا كلمه من الخطبه إللي قولتها قولتله حاضر هكتبها واجيبها لحضرتك فى الإجتماع الجاي إن شاء الله لحد ما أفتكر بقي

وخرجت لأبله منال إللي أول ما عرفت ماكنتش مستوعبه !!!
~
~
~
إفتكرت الموقف ده أول إمبارح وماكنتش أعرف إن بعد مرور السنين دي كلها الموقف ده هيكون سبب فـ ضحكه لقلبي وبسمه مرسومه علي شفايفي بعد فتره من الضغط النفسي :"))
وكوني أفتكره وربّي يومها يفاجئني كالعاده وأسمع إسمي رغم إنه عكس المتوقع والسائد :")) رجعلي #الأمل فـ حاجات كتير دلوقتي :')) ~

عشان كده حبيت أحكي الموقف ده لإن أكيد فيه ناس زيي كده كلمة مستحيل نسيتهم إن معاهم أقوي سلاح #الدعاء )

(( و الله علي كل شىءٍ قدير )) بتأكد إن مفيش #مستحيل :'))

لـ #ندا_سليمان