ملك و عمتو ندا :D

من طرف ندا سليمان الأحد ديسمبر 07, 2014 1:23 pm

[img]

[/img]

ملك : عمتو ندا

أنا : نعم يا ملك ؟

ملك: أنا عاوزه أكتب جواب لبابا

أنا : مااشى إكتبيله

ملك: بس هستناه أما يجي من السعوديه بقى عشان أديهوله

أنا : ليه نستنى ما ممكن نصوره ونبعتهوله من ع النت زى ما ببعت صوركم

ملك: صح ماشى إكتبى يلا

أنا : أكتبلك إيه ؟؟

ملك بصوت واطى وكأنها بتقولى سر : بصى إنتى مش هتكتبيله لأ أنا إللى هكتب بس بصى إفهمينى
إنتى يعنى إكتبى الكلام إللى هقولك عليه وأنا هكتبهوله فى ورقه تانيه زيه بالظبط عشان انا مش عارفه بيتكتب إزاى

أنا : ماشى إتفقنا قولى عاوزه تقوليله إيه ؟

ملك: أممممم عاوزه أقوله ((وحشتنى يا بابا يا قلبى ونور عنيا ))

كتبت فى الورقه و أخدت منى ورقه وقلم كتبت الجمله إللى أنا كتبتها وقالت خدى بقى صوريها وإبعتي الجواب لبابا

أنا : مااااشى

ملك: عمتو ندا ؟

أنا بنفاد صبر : نعمممممممم !!

ملك: هو إللى أنا كتبته ده شعر صح ؟

أنا : هههههههههههههه أيوه صح يا ملك

ملك: ماشى

وهى خارجه من الباب رجعت وكأنها إفتكرت حاجه : إنتى عارفه ؟ بابا لما يشوف الجواب ده هيفرح أوى وهيقولى فى التليفون يا ملك أنا شفت كلام حلو ع النت

وخرجت بتضحك

#عن_ملك_يحي_سليمان_ذات_الـ_6_أعوام_أتحدث

الله على براءة الأطفاء لما تفاجئك بأفعال تخلى دموعك تنزل

الله على براءة الأطفال إللى بعشقهاااا وخاصه لو من ملك قلبى

لـ #ندا_سليمان