لماذا لا تُصَلي ؟؟ !!

[img][/img]


_السلام عليكم ورحمة الله وبركاته

*وعليكم السلام ورحمة الله وبركاته

_إيه ده إنت بترد تحية الإسلام ؟؟!! يعنى إنت مسلم اهه ؟؟

*أيوه طبعاً

_متأكد !!!!

*إحنا هنهزر طبعاً مسلم والحمدلله على نعمة الإسلام

_مممممممم لأ مش قصدى بس مستغربه

*من ايه ؟؟!!

_من إنك مسلم ومش بتصلى !!!

*الإيمان وحب الله فى القلب مش لازم أصلى عشان أثبتهم !!!

_مممممم كداب

*نعمممم !!!!!

_أيوه كداب إنت نفسك لو حاولت تقنع نفسك بالجمله دى هتلاقى نفسك بترد عليك وتقولك يا كداب

*مش فاهم قصدك ؟؟!!

_حاضر أفهمك إزاى بتقول الإيمان فى القلب وهو لو القلب آمن كان ساب عماد الدين !!!!! وهو لو حب ربنا فعلاً فى قلبك كنت سيبت الصلاه إللى هى أهم حاجه فى الإسلام أصلاً إللى هى أهم حاجه هتقربك من ربنا !!

*مش إنتى إللى هتحكمى عليا على فكره !!!

_أكيد مش أنااا طاب بص كده معايا الآيات دى
((كُلُّ نَفْسٍ بِمَا كَسَبَتْ رَهِينَةٌ (38) إِلَّا أَصْحَابَ الْيَمِينِ (39) فِي جَنَّاتٍ يَتَسَاءَلُونَ (40) عَنِ الْمُجْرِمِينَ (41) مَا سَلَكَكُمْ فِي سَقَرَ (42) قَالُوا لَمْ نَكُ مِنَ الْمُصَلِّينَ (43) وَلَمْ نَكُ نُطْعِمُ الْمِسْكِينَ (44) وَكُنَّا نَخُوضُ مَعَ الْخَائِضِينَ (45) وَكُنَّا نُكَذِّبُ بِيَوْمِ الدِّينِ (46) حَتَّى أَتَانَا الْيَقِينُ (47) فَمَا تَنْفَعُهُمْ شَفَاعَةُ الشَّافِعِينَ (48)))

معلش هتعبك إرجع إقراها تانى كده وأقف بعنيك وإقرا بقلبك دقيقه الآيه #مَا_سَلَكَكُمْ_فِي_سَقَرَ_قالُوا_لمْ_نَكُ_مِنَ_الْمُصَلِّينَ !!! طاب بص معايا كده آخر الآيه #فَمَا_تنْفَعُهُمْ_شَفَاعَةُ_الشَّافِعِينَ ياااااااااااا الله إنت مش متخيل مدى الجريمه دى !!!

بص بقى معايا ع الحديث ده كده (( قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ إِنَّ الْعَهْدَ الَّذِي بَيْنَنَا وَبَيْنَهُمْ #الصَّلَاةُ فَمَنْ #تَرَكَهَا فَقَدْ #كَفَرَ ))

إيه ساكت ليه ؟؟!!! لسه مش مقتنع بعد ما جبتلك آيه وحديث !!!
هو إنت مش خايف من ربنا ؟ ولا من الموت ؟!

*أكيد خايف طبعاً !!

_طيب ما بتصليش ليه ؟! إنت مش عارف إن أول حاجه هتتحاسب عليها بعد ما تموت هى الصلاه ؟؟!! طاب لو ربنا سألك عنها هتقوله إيه ؟؟!!
مش لاقى حاجه تقولها صح !!!!

طاب معقوله لو الصلاه مش مهمه كان رسولنا الكريم صلوات الله وسلامه عليه وصّى عليها قبل ما يموت ((الصلاة الصلاة )) !!!
إقرا معايا كده قول ابن القيم الجوزي رحمه الله : (الصلاة : مجلبة للرزق . حافظة للصحة دافعة للأذى ، طاردة للأدواء ، مقوية للقلب ، مبيضة للوجه ، مفرحة للنفس ، مذهبة للكسل ، منشطة للجوارح ، ممدة للقوى ،شارحة للصدر، مغذية للروح ، منورة للقلب ، حافظة للنعمة ، دافعة للنقمة ، جالبة للبركة, مبعدة من الشيطان, مقربة من الرحمن ). ياااااه شفت فاتك اد إيه لما سيبت الصلاه !!!!!
طاب بص كده ع الصوره إللى جيبهالك شايف إللى بيصلوا دول ؟؟!! مش مكسوف من نفسك وإنت إنسان معافى وعندك ايد ورجل ومع ذلك مابتصليش ولا بتشكر ربك ع النعم إللى قادر ياخدها منك فى لحظه دى !!!

إنت مش عارف إن تارك الصلاه ربنا بيعاقبه في الدنيا والآخره !!! عارف بقى أنا واثقه إن إنت حياتك متلغبطه وعايش في كرب وضيق ومشاكل ملهاش أول من آخر

*أأ أنا أنا لأ طبعاً أنا مش عايش لا في كرب ولا ضيق وعايش حياتى تمام أووى

مممم رجعنا نكدب تانى طاب بص على عنيك وإنت بتقولى انا عايش حياتى تمام !!
إقرا كده الآيه دى ((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))

*أنا عارف كل الآيات إللى بتقوليها دى بس انا بحب ربنا بجد

_ممممم طيب ممكن أسألك سؤال؟؟؟

*إتفضلى

_لو جيت قولتلك إنك هتقابل المحافظ لأ نخليها الوزير ولا أقولك خليها رئيس الجمهوريه الساعه كذا بالضبط والرئيس مستعد يسمعك ويحل كل مشاكلك ، هتعمل إيه ؟ وهتلبس ايه ؟ وهتروح إمته ؟

*أكيد هلبس أحسن لبس عندى وأروح قبل الميعاد كمان ماينفعش أتأخر وهقوله كل إللى عندى

_طيب وهو ماينفعش تتأخر ليه ؟؟!!

*عشان انا اللى محتاجه ، محتاج يحللى مشاكلى ويساعدنى !

_حلوووو أوووووى خليك فاكر إن إنت اللى قلت #انا_إللى_محتاجه !!!

تخيل بقى لو قولتلك هتقابل إللى خلق الرئيس ده وخلق الكون كله وخلقك إنت كمان بس 5 مرات في اليوم لا ومش كده وبس ده مش هيقولك لو سمحت وقتك خلص !! ده مستعد يسمعك لو هتشكى طول عمرك !! مع إنه عارف شكواك أكتر منك إنت نفسك )
إنت كنت محتاج للرئيس عشان يحل مشاكلك
مابالك بإللى عارف كل مشاكلك ويقدر يحلها ويرزقك السعاده في الدنيا وكمان في الآخره
أهه هى دى بالضبط #الصلاه

إنت بتقابل ربنا في اليوم 5 مرات إنت إللى محتاجله على فكره مش هو إللى محتاجلك !!! وأظن إنت إللى قلت !
طاب مش حاسس بخجل من نفسك وإنت بتتكلم عن تشوقك تشوف الرئيس لا وكمان بتقولى هتروح قبل الميعاد ! مش حاسس بخجل بقى إنك عايش كل ده من غير ما تصلى !!! مش حاسس بمدى المصيبه إللى إنت فيها دى ؟؟!!!

طاب بص مش هكلمك في الناحية الشرعيه يا سيدى إنت تعرف إن الصلاه ليها فوائد طبيه ؟؟

*نعم ؟؟!!! إزاى ؟؟!!

_أه والله ،،،،تعرف إنها شفاء للنفس والبدن ؟ تعرف إنها وقاية ليك من الدوالى ؟ بتقوى العظام ؟ تعرف إن الصلاه علاج نفسى ؟

بص دى بقى معايا كده الصلاه بتقوى عضلات البطن لأنها بتمنع تراكم الدهون اللى تؤدي إلى البدانة و الترهل، فبتمنع تشوهات الجسم وتزيد من رشاقته!!
شفت إنت تاعب نفسك في أنظمة الرجيم ومش عارف إن الصلاه لوحدها بتعمل كل ده ؟؟!! الصلاه لوحدها قادره تنظم جسمك

لا وكمان الصلاة بحركاتها المتعددة بتزيد من حركة الأمعاء فتقلل من حالات الإمساك وتقي منه، وتقوي كمان من إفراز المرارة،،،
وضع الركوع والسجود وإللى بيحصل فيه من ضغط على أطراف أصابع القدمين بيؤدي إلى تقليل الضغط على الدماغ، وعشان كده إللى بيصلى بيحس بالاسترخاء والهدوء
والسجود الطويل بيؤدي إلى عودة ضغط الدم إلى معدلاته الطبيعية في الجسم كله، وكمان بيعمل على تدفق الدم إلى كل أجهزة الجسم
الوضوء لوحده طهاره لبدنك وطهاره من ذنوبك

ها كفايه ولا اقول كمان !!! ملكش حجه قولتلك فوائد الصلاه على صحتك وكمان في الشرع صدقنى الصلاه هى نجاتك وجنتك

إقنعنى إنت بقى إنى أسيب الصلاه واوعدك لو قولتلى سبب واحد مقنع أنا مش هصلى تانى !!

سكتت ليه ؟؟!! مش لاقى سبب يقنعك إنت نفسك عشان تسيب الصلاه صح ؟؟!!

*أأأنا

_حاسس بندم ؟؟

*أووووى انا مش عارف إزاى ضاع منى كل ده من غير ما اصلى أكيد ربنا مش هيقبلنى أبدااا

_إستنى مين قال إن ربنا مش هيقبلك ؟؟!!

إقرا معايا الآيه دى بس بقلبك لو سمحت مش بعنيك وياريت تعلى صوتك عشان ودنك تسمع تلاوتك :
) ((قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ "

إقرا دى كمان كده ((وَالَّذِينَ إِذَا فَعَلُواْ فَاحِشَةً أَوْ ظَلَمُواْ أَنفُسَهُمْ ذَكَرُواْ اللَّهَ فَاسْتَغْفَرُواْ لِذُنُوبِهِمْ وَمَن يَغْفِرُ الذُّنُوبَ إِلاَّ اللَّهُ وَلَمْ يُصِرُّواْ عَلَى مَا فَعَلُواْ وَهُمْ يَعْلَمُونَ ، أُوْلَئِكَ جَزَاؤُهُم مَّغْفِرَةٌ مِّن رَّبِّهِمْ وَجَنَّاتٌ تَجْرِي مِن تَحْتِهَا الأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ "

*^_____^

_أيوه كده حلوه الإبتسامه الصافيه دى ها مش يلا بقى لسه الأوان ماجاش عشان تلحق نفسك !! أرجووك بلاش تضيع ثانيه واحده كمان من عمرك وانت عند الله #تارك_للصلاه
قسماً بربّي أنا بكتب الكلام ده وأنا كلى خوف عليك ودمعتى غلبتنى أنا نفسى بجد تقتل الشيطان وتقوم دلوقتى حالاً تتوضى إلبس وافرش سجادة الصلاه إرمى أى حاجه بتفكر فيها وخلى تركيزك كله معاه #ربنا
إقرا بصوت تسمعه ودنك عشان تلاوتك بكلام ربك تدخل قلبك وتطمنه اركع واسجد وقول لربنا كل إللى فى نفسك ماتفكرش ولا ترتب اللغه إللى هتكلمه بيها قول كل إللى فى نفسك بلغة قلبك وهو هيسمعك ويفهمك لأنه أعلم بيك منك

* يااااااااااااااااااااااااا الله أنا مش هضيع لحظه تانيه من غير صلاه مش هضيع لحظه تانيه وانا بعيد عن ربنا

_أهه كده إنت مسلم بصحيح ، بس إستنى اما اقولك بعد ما تخلص صلاه شوف حد من صحابك إللى ماكانوش بيصلوا زيك وقولهم الكلام ده خد بإيديهم إنت كمان إتقاسمتوا فى المعصيه إتقاسموا كمان فى الخير ما تبقاش أنانى وتقرب للجنه لوحدك خد أخوك فى إيديك

دي رساله لتارك الصلاه من قلب أخت خايفه عليكم بجد

لـ #ندا_سليمان —