رمضان خلص مالحقتش أحس بيه

[img][/img]

_رمضان خلص مالحقتش أحس بيه

بس بإيدينا نخليه مايخلصش ونحس بيه طول الوقت !!!!

_إزاى ؟؟!!!

هقولك ,,,خليه يعيش معاك طول السنه

_ ده جنان بقى إزاى برده مش فاهم ؟؟!!

لو ده جنان #إتجنن !!!!!

❒ صوم 6 أيام من شهر شوال ولك أجر صيام الدهر

❒ خليك مواظب على كل صلواتك فى مواعيدها وع الأذكار

❒ حافظ ع السنن كلها زى ما كنت محافظ عليها فى رمضان

❒ واظب على إنك تصحى فى النص الأخير من الليل وتحيي ليلك ولو بركعه تشكى فيها لربك كل همومك وتشكره على نعمه إللى مغرقاك

❒ عود نفسك ما تفوتش الفريضه الضائعه (صلاة #الفجر ) أبداً زى ما كنت فى رمضان بتسهر وتستنى الفجر إستناه كل يوم وصليه والله هتحس براحه وطمئنينة مفتقدها إللى نايم عن صلاة الفجر

❒ جرب تسجد لربنا بس عشان تقوله #بحبك #ياارب

❒ إتسابق عشان تختم القرآن أكتر من مره كل الشهر

❒ واظب على صيام إتنين وخميس والأيام القمريه من كل شهر هجرى

❒ واظب على إنك تسمع دروس دينيه وخطب وبرامج هادفه زى ما كنت فى رمضان

❒ حاول تتفقه فى دينك وتعرف معلومات عنه ، لأنك مهما كانت درجة معلوماتك وثقافتك قصاد إنك مش عارف حاجه عن دينك هتكون صفررر ...!!!

لو ده جنان #إتجنن !!!!!

❒ حافظ على أُذنك من الأغانى زى ما كنت محافظ عليها فى رمضان مش هتخسر حاجه لو مسحت كل الأغانى إللى على موبايلك وبدلتها بكلام الرحمن

❒ تدريجياً سيبك من المسلسلات إللى ملهاش لازمه والأفلام الهابطه إللى موجوده دلوقتى ، مش هينفعوك بحاجه هيضيعوا وقتك ع الفاضى ويخسروك آخرتك كمان !!

❒ حافظ على كل حواسك من أى ذنب وماتنساش إن حتى جلدك هينطق ويشهد عليك يوم القيامه
حَتَّى إِذَا مَا جَاؤُوهَا شَهِدَ عَلَيْهِمْ سَمْعُهُمْ وَأَبْصَارُهُمْ وَجُلُودُهُمْ بِمَا كَانُوا يَعْمَلُونَ (20)وَقَالُوا لِجُلُودِهِمْ لِمَ شَهِدتُّمْ عَلَيْنَا قَالُوا أَنطَقَنَا اللَّهُ الَّذِي أَنطَقَ كُلَّ شَيْءٍ وَهُوَ خَلَقَكُمْ أَوَّلَ مَرَّةٍ وَإِلَيْهِ تُرْجَعُونَ(21)وَمَا كُنتُمْ تَسْتَتِرُونَ أَنْ يَشْهَدَ عَلَيْكُمْ سَمْعُكُمْ وَلا أَبْصَارُكُمْ وَلا جُلُودُكُمْ وَلَكِن ظَنَنتُمْ أَنَّ اللَّهَ لا يَعْلَمُ كَثِيرًا مِّمَّا تَعْمَلُونَ(22)
((من سورة فصلت))

❒ حتى لو ماكنتش بتحب القراءه حاول تعود نفسك عليها و تحبها ، حدد لنفسك تقرأ ع الأقل كتاب كل شهر أصل ما ينفعش تقول ما بحبش القراءة وإنت من أمة #إقرأ


❒ إعتذر لأى حد غلطت فى حقه وسامح
الدنيا مشوار صغير وهنمشى مفيش وقت للحقد أو الزعل من بعض والقلوب فيها إللّى مكفيها ومش محتاجه تزيد عليها وتشيل من حد

❒ جرب تسأل على كل صحابك إللى بقالك سنين ما تعرفش عنهم حاجه ماتقولش ماهم مسألوش عنى !!
إنت بتعامل ربنا مش بتعاملهم هم ، ماتستناش لما هم يسألوا الأول إكسب إنت الثواب يا سيدى وحد يرفض ثواب هيجيله لحد عنده ؟؟!!

❒لو حصلت مؤخراً خلافات بينك وبين حد من صحابك أو قرايبك بسبب السياسه أو أياً كان السبب روح وإعتذر وماتقولش ماهو إللى غلطان ليه ما يعتذرش هو ؟؟!!
ماتنساش (خيركم من بدأ بالسلام )

لو ده جنان #إتجنن !!!!!

❒ خد بالك من كل تصرفاتك وحاول تبطل العادات الذميمه وتنمى العادات الحسنه إللى عندك زى ماكنت بتعمل فى رمضان

❒ خد قرار إنك كل ما تخرج أو تشترى حاجه جديده تطلع صدقه عليها كنوع من أنواع شكر الله على نعمه

❒ جرب حتى لو كل شهر أو شهرين تزور مستشفى أودار أيتام أو دار مسنين تشترك فى الأعمال الخيريه والتطوعيه وتساعد غيرك بجد هتديلك إحساس لا يوصف بالسعاده هتحس بالنعمه إللى إنت فيها بجد

❒ صفّى نواياك وخلّى نيتك فى أى حاجه بتعملها #لله والله النيه لوحدها بتاخد عليها أجر

❒ جدد قلبك دايماً بذكر الله حافظ على إبتسامتك
ودايماً كون بشوش وعون لغيرك عشان ربنا فى وقت ضيقك يعينك

❒ المسلم قدوه ، خليك دايماً قدوه لغيرك ، ولو شايف إن كتيير من المسلمين شوهوا صورته دلوقتى خليك إنت الصوره الصح للإسلام خليك سفير لدينك فى كل مكان

من الآخر كده

#خلّى #حياتك #كلها #رمضان #عشان #الآخره #تبقى #عيدك

لــ #ندا_سليمان