شيفاكى زى ما تكونى مركب

شيفاكى زى ما تكونى مركب
محمله شعب تعيس وبتغرقى
وما تغرقيش ليه
وقبطانك هو إللى بإيديه بيغرقك؟؟؟

أعذرينى يا مصر وما
تقوليش راح فين الأمل؟؟
كنت دايماً مهما أشوفك تغرقى
أضحك وأقول للكون ما تخفوش

أنا لسه شايفه فى عيونها الأمل
بس أنا دلوقتى ببص فى عيونك
مش شايفه غير حداد
على روح ولادك إللى بيروحوا هدر

هى ليه روح ولادك بقت رخيصه كده؟؟؟

ولسه برده عوزانى اشوف فيكى امل؟؟؟


صعبان عليا كل أم

شالت طفلها فى مهده وكبرته
لجل ما تشوفه دايماً رافع راسك
دلوقتى شيفاه فى الكفن
ودمه مغرق ترابك

طفل ودع أمه بضحكته
إللى بتشرح قلبها
ورجعلها محمول على الأكتاف
وأتاريها طلعت آخر ضحكة هتسمعها
وأتارى عيونها خلاص ودعت نورها
وإزاى تنور تانى وضناها
جيلها ميت كده من غير
ما تعرف ذنبه إيه؟؟؟؟

عاجبك كده كل يوم تودعى
ورده من ورودك؟؟


مش عايزه أقول يا بلدى خلاص دى نهايتك
أنا برده لسه هقول فيكى أمل
رغم إن عينى مش قادره تشوفه
من السواد إللى قتل شمسك

لسه هقول عندى أمل
خريفك يتبدل ربيع أخضر

لسه بقول مهما يموتوا ولادك
هيتولد جيل جديد
يرجعلك ويرجعلنا حقك

ويحيى شمسك ويّا نهارك
وياخد لكل شهيد حقه على أرضك .......

بقلمى / نــــدا سليمـــان