فقرة خاصه بـ تربية الأطفال (ربّي طفل شجاع)

في البداية كده يؤسفني أن أخبركم أنه في منطقتنا قد تم إضافة
(( أبله ندا )) لأسطورة أمنا الغوله وأبو رجل مسلوخه والعووو والعفريت وأبو شوال .....إلخ
ماتستغربوش  بس أنا فعلاً الأطفال بقت بتخاف مني ومش بسبب النقاب عشان عارفه إن ده أول تخمين دماغكم هتروحله !
بسبب الحقن  !!!
بدّي حقن لأطفال جيراننا
وجاراتي العزيزات بقوا لما حد من ولادهم يعمل حاجه غلط يقولوله هجيبلك *أبله ندا * تديلك الحقنه !!!
ولإن الأطفال مش فاهمين إن الحقنه دي عشان مصلحتهم و سبب أهم من وجعها ألا وهو الشفاء بإذن الله ،،بالتالي أصبح كل طفل ناسيلي أي حاجه حلوه ومرتبط في ذهنه أول مايشوف ندا يفتكر الحقنه  رغم إني كنت بتشقلبلهم وأدي في حاجات حلوه وألآعب فيهم وأتحول لبهلوان أثناء هذه العمليه الشاقه وأحيان كتيره بتضرب  بس الله يسامح أمهاتهم بقى هم السبب  !!!
أنا بحكي الكلام ده ليه ولزمته إيه أصلاً  ؟!
لزمته إن موضوع الحقنه ده إللي شجعني أكتب البوست وحابه أنبه كل أم حالياً أو أم مستقبليه إن شاء الله بخطأ ممكن تقع فيه من غير ماتقصد والخطأ ده يربي مبادئ هتتعبها في تربيه طفلها وهتتعبه هو لما يكبر ،،،، كفايه مقدمات وخلينا ندخل في المفيد
~الخطأ الأول ~
أمهات كتيره وأغلب أمهاتنا كمان كانوا بيعملوا معانا كده (( ماتطلعش بره أو ماتروحش الحته الفولانيه أو ماتعملش كذا عشان أبو رجل مسلوخه ،، العفريت ،،، أمنا الغوله ...إلخ من الحاجات إللي كانوا بيرعبونا بيها ومازالت متوارثه حتى الآن  ))
وردة الفعل الطبيعيه من الطفل إنه بيخاف و يستخبي فيتزرع جواه الجُبن والخوف من المجهول ،،هو عمره ما شاف أمنا الغوله ولا أبو رجل مسلوخه ولا الحاجات دي كلها بس بيبدأ خياله الخصب يصورله الكائنات دي فتلاقي طفلك جبان زي مثال الحقنه كده بتربي جوه الطفل يقين إن أي حاجه بتوجعهه لازم يخاف منها ويهرب بدل ما يواجه !
فيكبر ويفضل جانب من خوف الطفوله جواه متمثل في خوفه من المستقبل أو من المجهول في حياته أو من مواجهة أي مشكله بيبدأ يعمل نفس ردة فعله وهو طفل ‫#‏الهروب‬ !
~الخطأ التاني ~
أيام ما كنت بدّي أطفال في المقرأه لما كان فيه مقرأه يعني  !
جت بنوته فـ مره عيونها حمرا من كتر العياط فسألتها مالها قالتلي أنا ماحفظتش وماما قالتلي ربنا هيحرقني في النار  !!!!!!!!
((إسمع كلام ماما وبابا عشان ماتروحش النار ،، لو عملت كده تاني ربنا هيوديك النار ، لو ما حفظتش قرآن وماصلتش ربنا هيوديك النار ، النار النار النار  ))
طبيعي يتكون في ذهن الطفل إن ربنا عنده نار بس ،، ربنا بيعاقب بس ! فهيحبه ليه بقى  !!!!!
يبدأ يصلي ويحفظ قرآن ويقرب من ربنا بس عشان خايف من النار مش عشان بيحب ربنا !!!
وفيه فرق كبييير أوي بين ده وده ) !
بتخلقي طفل مريض بالخوف  !
طيب وحضرتك هتخسري إيه لو بدلتيها بـ لو ما عملتش كذا مش هتروح معانا الجنّه ، ده الجنه بتاعة ربنا فيها كذا وكذا وعشان تروحها لازم تحفظ قرآن وتصلي وتصوم وتسمع كلام ماما وبابا ....إلخ
ولو عمل حاجه غلط هتخسري إيه لما تفهميه بهدوء وتقوليله (( ربنا كده زعلان منك وممكن ماتروحش معانا الجنه بس تعرف بقى إن ربنا جميل وبيحبنا أوي وعشان كده لو قلت استغفر الله العظيم كتير ربنا هيحبك ومش هيزعل منك وتروح الجنه  ! ))
*
كلمي طفلك عن ربنا كتير حببيه في ربنا عشان يطلع بيعبد ربنا وفاهم دينه صح وملتزم بالدين صح
*بلاش تزرعي الجبن جوه طفلك وترجعي تشتكي إنه جبان وبيخاف لإن العيب مش منه هو منك إنتي أصل طفلك عجينه إنتي إللي بتشكليها !
.
.
أنا خلصت بس بما إني جبت سيرة ‫#‏الخوف‬ فأنا سمعت قبل كده طبيب نفسي بيتكلم عن موضوع مهم ((الأطفال إللي بتخاف من الضلمه))
تعرفي إن إنتي بحركه لا إراديه منك خليتي طفلك يخاف من الضلمه ؟!
أقولك إزاي ،،،، لما يكون الطفل نايم بالليل ويحلم بحلم وحش ولا يخاف وتلاقيه يصرخ وينده عليكي أول حاجه بتعمليها تجري تفتحي النور وتضميه فيتكون في ذهنه إن الخوف مرتبط بالضلمه وإن أول ما النور يشتغل هيلاقي حضن أمه ويلاقي الأمان !
لذلك الدكتور كان بينصح إنك لما تلاقي طفلك بيصرخ بالليل قبل ما تفتحي النور ضميه في حضنك الأول وطمنيه وإقريله قرآن ولما يهدي إبدأي إفتحي النور  
~
~
بإختصار بقى
ربّي طفل يعبد ربنا عشان بيحب ربنا قبل ما يكون خايف من النار والعذاب !!!!
ربّي طفل شجاع يواجه أي مشكله في حياته ويهزم الخوف  
((ربنا يجعل ولادكم سبب في دخولكم الجنّه   ))
لـ ‫#‏ندا_سليمان‬